Esteban Urzelai izango da EHGAko zuzendari berria 2024-2025 denboraldian. Xabier Mendezen laguntza izango du zuzendari laguntzaile gisa.

ESTEBAN URZELAI EIZAGIRRE (Oñati, 1979)

Donostiako Goi Mailako Musika Kontserbatorioan goi mailako piano tituluduna da eta Musikenen Koru-Zuzendaritzan Gabriel Baltés maisuarekin. Bere ikasketak Musikenen Orkestra-Zuzendaritza ikasketekin osatu zituen, Arturo Tamayo maisuarekin, Enrique Garcia Asensio eta Manel Valdiviesorekin hasi ondoren. Hainbat ikastaro egin izan ditu, hala nola, J. Duijck L. Heltay, V. Miskinis, J. Casas, M. McGlynn edo J. M. Pérez Sierrarekin esaterako. Industri antolakuntzan ingeniaria da.

1996 eta 2009 artean Oñatiko Ganbara Abesbatzako zuzendari izan zen, eta abesbatza honekin sari anitz irabazi zituen, 2004ko Abesbatzen Sari Nazional Nagusia, esaterako. 2004tik Donostiako Orfeoi Txikiaren zuzendari da, eta 2006an Donostiako Orfeoi Gaztearena. Azken honekin, 2016an Ejea de los Caballeroseko lehiaketako gazteen atalean lehen saria lortu zuen eta 2019an Nafarroako IV. “Acapella” lehiaketa nazionalean, polifonia eta folklore saileko lehen sariak, publikoaren saria eta zuzendari onenaren saria. 2007tik Donostiako Orfeoiaren zuzendariorde artistikoa da. 2016 eta 2019 artean, Euskal Herriko Gazte Abesbatzaren zuzendari izan zen, eta 2018tik Suhar gizon koruaren sortzaile eta zuzendari da. 2020ko abenduan Coro Nacional de España abesbatzaren zuzendari ordeko plaza lortu zuen.

Abeslari bezala, hainbat ahots taldetako kide izan da (KUP Taldea, Conductus Ensemble, KEA Ahots Taldea) eta Europako Gazte Abesbatzan eta Internationale Bächakademie Stuttgart abesbatzan parte hartu du, F. Bernius, J. Prinz, F. Sjöberg, M. Guinand edo H. Rilling bezalako zuzendariekin.

Zuzendaritza eta interpretazio ikastaro ugari eman ditu:

• Gipuzkoako Abesbatzen Federazioarekin aktiboki dabil elkarlanean, eta irakasle gonbidatua izan da hainbat haur abesbatzen eta gazte abesbatzen Tailerretan.
• Euskal Herriko Abesbatzen Elkarteak 2011ean antolatutako Kantaldi Irekiko irakasle izan zen, Javier Busto eta Juan Pablo de Juan zuzendariekin batera.
• Euskal Herriko Abesbatzen Elkarteko Zuzendaritza Akademiako irakasle izan da 2012tik, eta hainbat zuzendaritza ikastaro eman ditu Bilbon, Galizian, Málagan, Sevillan edo Madrilen, esaterako.
• Abesbatza ezberdinekin interpretazio tailerrak egin ditu, hala nola, Badajozen, Kordoban, Galizian, Asturiasen, Madrilen, Ciudad Realen eta Albaceten.

XABIER MENDEZ ARETXABALETA (Bilbao 1993)

Bilbon jaio zen 1993an, eta txikitatik musikarekiko interes handia sortu zuen. Musika ikasketak 5 urte zituela hasi zituen Bilboko Koral Elkartean eta gitarra klasikoko maila profesionala osatu zuen Juan Crisostomo de Arriaga Kontserbatorioan. 10 urte zituela, Bilboko Koral Elkartean ikasten ari zela, kontserbatorioko abesbatzara batu zen, eta han deskubritu zuen musika koralarekiko zuen grina. Ondoren, Bilboko Koral Elkarteko Euskeria gazte abesbatzan eta Kataluniako Orfeoiaren gazte abesbatzan parte hartu zuen.

Koru zuzendaritzarekiko maitasuna Esteban Urzelai maisuarekin ikasten hasi zenean loratu zen. Hainbat ikastaro egin zituen Euskal Herriko Abesbatzen Konfederazioak antolaturiko koru zuzendaritzako akademian, eta Aitor Biain, Pere Lluis Biosca, Lone Larsen eta Mikael Weddar zuzendariekin trebatu izan da. Gainera, Marta Ubieta sopranoaren, David Fernandez tenorraren eta Nuria Orbearen ahots-teknikako eskolak jaso ditu.

2018an, Areetako Zozoak Abesbatzan hasi zen zuzendari gisa, eta postu hori izan zuen 2023ra arte. 2019an, Akelarre Abesbatza sortu zuen, Bilboko gazteen artean musika korala sustatzeko asmoz. Ordutik, Akelarre Abesbatza erreferentziazko abesbatza bihurtu da euskal abesbatzen panoraman. Gaur egun, Akelarre Abesbatza zuzentzeaz gain, Deustuko Unibertsitateko Iubilo Bilbao Abesbatza eta Xemein Abesbatza ere zuzentzen ditu.

Bere ibilbide musikal nabarmenaz gain, bere prestakuntza akademikoa osatu du eta Fisikako doktore titulua lortu du UPV/EHUn 2023an. Gaur egun, UPV/EHUko Fisika graduko irakaslea da eta CSICeko ikertzailea.